“De compromiso en compromiso” é o lema de La Salle para o curso 2025-2026.

Apoiándonos nunhas palabras do noso fundador san Xoán Bautista de La Salle, o valor do compromiso esténdese desde os inicios do proxecto dos Irmáns das Escolas Cristiás ata os nosos días, deixándose notar en cada unha das accións que levan a cabo para facer realidade a misión lasaliana.

“Deus, que todo o guía con sabedoría e suavidade e non adoita forzar a inclinación dos homes, querendo comprometerme a tomar enteiramente o coidado das escolas, fíxoo de maneira moi imperceptible e en moito tempo, de modo que un compromiso me levaba a outro, sen que eu o previse ao comezo”. (MSO 6)

O compromiso lasaliano implica estar en proceso, implica formar parte, implica ter esperanza. Tal e como san Xoán Bautista viviu o compromiso, comprometerse nace da decisión meditada de dedicarse a unha causa na que cremos, e que ten no centro as persoas, sobre todo, a aquelas que máis o necesitan. Comprometerse tamén é formar e tomar parte, mirar máis aló e traballar, desde a nosa vocación, para contribuír á misión. Comprometerse é un acto de esperanza porque, sexa cal for o noso labor, sempre desde os nosos principios e valores, os lasalianos e lasalianas temos fe no futuro.

O mundo actual, no que se instalou o conflito e a desigualdade, que presenta innumerables desafíos en todos os ámbitos, necesita de persoas que fagan valer o seu compromiso. O de La Salle segue sendo apostar pola educación como ferramenta de transformación social, dedicándose ás persoas, ofrecéndolles acompañamento para o seu desenvolvemento integral, buscando que sexan capaces de comprometerse para facer que a sociedade sexa máis xusta, solidaria, integradora e con oportunidades para todos.

E esta chamada ao compromiso tamén nos chega desde a nosa identidade máis profunda, desde o ADN que como lasalianos e lasalianas impregna o que somos e facemos e que nos lembra que “todo está conectado”. E desde esa conexión, co noso alumnado, coas nosas familias, cos nosos educadores e educadoras, coas nosas comunidades, seguimos dando pasos para que o proxecto de La Salle siga vivo e continúe crecendo.

Desde La Salle en España e Portugal convidámosvos a comprometervos e a seguir facendo realidade o compromiso que un día asumiu san Xoán Bautista de La Salle.

Benvidos e benvidas ao novo curso!