Gure historia

Gure historia La Salleko san Joan Bautista, Kristau Eskoletako Anaien Institutuaren Fundatzailearen eta Kristau Hezitzaileen Zaindariaren eskutik jaio zen.

Joan Bautista gurea ez bezalako mundu batean bizi izan zen. Duela 300 urte baino gehiago Frantziako iparraldean bizi izan zen familia aberats bateko seme zaharrena zen. 16 urte besterik ez zituela, Reimseko Katedraleko kalonje izendatu zuten. Gurasoak teologia ikasten ari zela hil zitzaizkion, eta familiaren ondasunak administratzeaz arduratu behar izan zuen. Ikasketak amaitu ondoren, apaiz ordenatu zuten.

Garai hartan, pertsona gehienak muturreko pobrezian bizi ziren. Familia gutxi batzuek bakarrik bidal zitzaketen seme-alabak eskolara. Haur gehienek etorkizunerako aukera gutxi zuten. Behartsu horien egoerak hunkituta, bere talentu guztiak, «askotan beren erara abandonatuta eta heziketarik gabe» ziren haur horien zerbitzura jartzea erabaki zuen.

Familia-etxea utzi zuen, baita bere kalonjetza eta fortuna ere. Berarekin elkartea osatu zuen maisu talde batekin bizitzera joan zen eta horrela jaio zen gaur egun Kristau Eskoletako Anaiak bezala ezagutzen duguna.

Bere bizi-ibilbidean ez zitzaion zailtasunik falta izan. Eliz agintarien aurkakotasunarekin topo egin zuen, ez baitzuten ulertzen bizimodu erlijioso berri haren sortzea, laiko sagaratuez osaturiko elkarte harena, eskolez «elkarrekin eta asoziazioz» arduratuz. Garai hartako hezkuntza-estamentuak asaldatu egin ziren haien metodo berritzaileek ikusirik eta irakaskuntza guztientzat doakoa izatearekin, familiaren egoera ekonomikoa edozein zelarik izanik.

Hala eta guztiz ere, La Salleko Joan Bautista eta bere Anaiek arrakasta handiz lortu zuten kalitatezko eskolen sare bat sortzea, ezaugarri hauek zituena: herri- hizkuntzaren erabilera, mailaka eta emaitzen arabera bildutako ikasle-taldeak, aldi bereko irakaskuntza, erlijio-formazioa, misioaren kontrastea eta hobekuntza bateratua eskolan, elkartearen bereizmenez. Gainera, La Salle berritzailea izan zen maisu sekularrak prestatzeko programak proposatu baitzituen, langile gazteentzako igandeetako ikastaroak eta delitugileak gizarteratzeko lehen erakundeetako bat izan zen.

Austeritatez eta lanez betetako bizitza baten ondoren, Rouengo San Yonen hil zen, 1719an, 68 urte bete baino aste batzuk lehenago.

La Salleko Joan Bautista santu gisa kanonizatu zuen Leon XIII.a Aita Santuak 1900 urtean Eliza Katolikoan. 1950eko maiatzaren 15ean, Pio XII.a aita santuak Kristau Hezitzaileen Zaindari izendatu zuen. Gaur egun, salletar eskolak 79 herrialdetan daude.

Hiru mende baino gehiagoren ondoren, Kristau Eskoletako Anaiek, beste zenbait hezitzaile sekularrekin (irakasle eta ez-irakasle) eta familiekin, Salletar Familia osatzen dute eta La Salleren obrarekin bat egiten dute, modu desberdinetan, Salletar hezkuntza misioa partekatzeko.

Salletarren presentzia Espainian 1878ko otsailaren 26an hasi zen, Jubino, Itamar de Jesus, Ivergilio Jose eta Joaquin Maria Anaiak Madrilera iritsi zirenean Jesusen Bihotzaren Umezurtzen Asiloaz arduratzeko, Atocha kalean; gaur egun ere funtzionatzen duen zentroa da nahiz beste leku batean (Cardenal Herrera Oria etorbidea). Ernestina Manuel de Villenak, Madrilgo burgesiako damak, Frantzian ezagutu zituen eta haien dohain pedagogikoak hiriburuko umezurtzentzat zuen karitate obretako batean baliatu nahi izan zituen.